देके हजार रपिये किराया जोश में रह ल्यांगे

देके हजार रपिये किराया जोश में रह ल्यांगे
उसके दिल में ना रहे तो पडोस में रह ल्यांगे

मिल्या करेगी नजर फेर रोजाना आपस में
वा बात नही करेगी तो हम रोष में रह ल्यांगे

जद तै सुणी बाप उसका थानेदार बणग्या सै
कदे भीतर करवा दे थोडा होश में रह ल्यांगे

वा पूरा डोसा खाग्गी तो के जी लिकडग्या माहरा
वा राज्जी रहियो हम तो सोस में रह ल्यांगे

होज्यागी रिश्तेदारी फेर गली के सब छोर्या तै
थारा जीजा लाग्गू सूँ इस धोंस में रह ल्यांगे


दे देगा अपणे सारे सोड-सोडिये बेचैन उसनै
जाड़े की भरी रात में भी ओंस में रह ल्यांगे

दिल कभी ले लिए सस्ते रेट दयूंगा

ओरिजनल नही फोटो स्टेट दयूंगा
दिल कभी ले लिए सस्ते रेट दयूंगा

शाहजहाँ नै तो बस ताज ए दिया था
तू मर मेरे खातिर इंडिया गेट दयूंगा

शक नही करूंगा तेरी किसी बात पै
बेझिझक बोल झूठ सब लपेट दयूंगा

दो घड़ी तो बैठ तू मेरे पास कभी
बहम तेरे मैं सब के सब मेट दयूंगा

आवण दे इबके वेलेनटाइन डे बेचैन
तैने गिफ्ट में हरियाणा स्टेट दयूंगा

इतणी पीवैंगे जब ताईं श्यामी आले तीन पेड छह ना दिखण लाग जां

एक बै लिलू अर धारा आहते मै बैठे पीण लाग रे
लिलू - भाई धारे आज तै इतणी पीवैंगे जब ताईं श्यामी आले तीन पेड छह ना दिखण लाग जां
आहते आला आया अर बोल्या - अरै कमिनों, श्यामी एक ए पेड सै, ईब के य्हाडै जंगल बणाओगे...?

मेरा छह मिह्न्या में छह किलो वजन घटा दि

ना पूछ तेरे प्यार नै किसाक धुम्मा ठा दिया

मेरा छह मिह्न्या में छह किलो वजन घटा दिया

शुक्र सै थोडा जिम ज्वाइन कर राख्या सै मैंने
तैंने खून फेर भी मेरा अच्छा अच्छा सूखा दिया

क्यूं फेर भी बात करण में तेरा जी नही करता
 नोकिया तक का तेरे तै मोबाइल दुवा दिया

मैं इस्ते ज्यादा बता और के करू भागवान
कालीन की ज्यूं आगे तेरे कालजा बिछा दिया

इससे ज्यादा खराब माट्टी के होवेगी बेचैन
तैने देशी छोरा एकदम सपरेटा बणा दिया

होता गर मैं गलती तै दुधिया मेरी जान

होता गर मैं गलती तै दुधिया मेरी जान
तुझे किलो दूध फालतू मैं रोजाना देता

शुक्र सै कोन्या मेरी परचून की दूकान
नही सारा सौदा फ्री में तेरा दीवाना देता

न्यू भी लड्डू सा भुरभुरा स्वभाव सै मेरा
कितना ए फोड़ के खा ना उल्हाना देता

मैं बेशक तै बेचता एक्सपाइरी सामान
पर तैंने कदे भी नही माल पुराना देता

इसकी मौज सै इसके यार कै कारण
 फेर तो पूरा गाम तैंने यो ताना देता

तेरे हिस्से की लामणी भी मैं कर देता
वक्त गर साथ काम करण का बहाना देता

बेचैन होकर करता मैं इतनी चाकरी
मिसाल मेरी मेरे बाद यो जमाना देता

जा अचार घाल लिए अपणे दिल का

राह गलत इश्क की मैं नादान पकड़ बैठ्या
एक बावळी गादड़ी के कान पकड़ बैठ्या

ईब कुछ समझ नही आ रह्या के करूं आखिर
क्यूं मैं अपनी मौत का सामान पकड़ बैठ्या

मैं ठहरा बंदर भला के जाणु अदरक का स्वाद
दही समझ कपास का खलिहान पकड़ बैठ्या

अक्सर तबियत खराब रहण का यो कारण सै
बदले में दिल न मिलण का नुकसान पकड़ बैठ्या

जा अचार घाल लिए अपणे दिल का बेचैन
गलती होगी तन्ने मेरी जान पकड़ बैठ्या

मत सोचिये मैं गुजरा होया दौर होग्या सूं

ना पूछ इश्क में कितणा कमजोर होग्या सूं
आजकल साँस लेवण का भी चोर होग्या सूं

पहल्या सी बात मेरे में किसे नै ना दिखती
दोस्त कहरे सै मैं तो कुछ और होग्या सूं

तू ख्यालों में आके लगा ले बाता में
मैं तो पड्या-पड्या कमरे में बोर होग्या सूं

जद आवे मेरी याद आवाज़ देके बुला लिए
मत सोचिये मैं गुजरा होया दौर होग्या सूं

सिर्फ एक बार बोल फेर नही पूछेगा बेचैन
अगर सच्ची तेरे कलेजे की कोर होग्या सूं

इन दिनों लुगाई नाराज चाल री सै

इन दिनों लुगाई नाराज चाल री सै
बेरा नै उसके कित खाज चाल री सै

पहल्या तो देख लिया करती मुस्कुराके
आजकाल गुस्से में बेल्याज़ चाल री सै

वा न्यू लिकाडै सै बात के कई मतलब
बोली नजर थारी दगाबाज़ चाल री सै

इलाज़ तो मन्ने भी कुछ करना पड़ेगा
वा ज्यादा ए खाके अनाज चाल री सै

कसूर कोन्या उसकी सोच में बेचैन
पतियों की फौज दगाबाज़ चाल री सै 

आप बी रांड हो ..हम बी रांड हैं ..

एक बे एक गाम में इंदिरा गाँधी की सभा थी .. नारी- मुक्ति पे ,, ज्याँ कर के ने घणी सारी लुगाई बी कट्ठी कर राक्खी थी ..एक अंग्रेज forein delegate बी गेल्याँ आ रहया था ..
इंदिरा जी ने भाषण देणा शुरू करया ते रमलू की माँ उनने देखण तई खड़ी होगयी ... नत्थू सरपंच ने रुक्का मारया - आ रांड धरई जा !!!!
अंग्रेज ने पूछ लिया - What is Raand??
इईब उसते के बताते .. एक journlist बोल्या ..रांड means Great.. सबने सांस ल्यी...
अंग्रेज ने बोहत बढ़िया लाग्गया ..
वो आपणी टूटी सी हिंदी में बोलल्या - आप बी रांड हो ..हम बी रांड हैं ..पर इंदिराजी सबसे बड़ी रांड हैं ....

लुगाई तै बड़ा जादुगर नही सै धरती पै

मरण तै पहल्या माँ मैन्ने सही बतागी थी
लुगाई तै बड़ा जादुगर नही सै धरती पै

इश्क करया पाछे या बात समझ में आई
एक इज्जत तै बड़ा डर नही सै धरती पै

महबूब या भगवान का सजदा करया सै
कोए बिन झुक्या होया सर नही सै धरती पै

झील समन्दर पार्क सबके सब बकवास
कोए महबूबा तै सुंदर नही सै धरती पै 

सब पुराणी हरकता का अंजाम सै बेचैन
कोए भी तो ताज़ा खबर नही सै धरती पै